Agar bolaning sog‘lig‘i holati nogironlikni belgilash uchun baholashni talab etsa, avval bola biriktirilgan poliklinikadagi oilaviy shifokor yoki pediatrga murojaat qiling. Zarur hollarda bola mutaxassislar ko‘rigidan o‘tadi, shundan so‘ng tibbiy-ijtimoiy ekspertizaga yo‘llanma rasmiylashtiriladi.
2026-yildan boshlab nogironlikni belgilash uchun arizani Yagona interaktiv davlat xizmatlari portali (YIDXP) — my.gov.uz orqali onlayn topshirish mumkin. Ariza topshirilgach, tanlangan oilaviy poliklinikaga borish zarur.
Bajarishingiz kerak bo‘lgan qadamlar:
- YIDXP orqali ariza topshiring yoki 1140 raqami orqali tartibni aniqlashtiring.
- Arizada ko‘rsatilgan oilaviy poliklinikaga boring.
- Zarur tekshiruvlardan va mutaxassislar maslahatidan o‘ting.
- Tibbiy-ijtimoiy ekspertizaga yo‘llanma oling.
- Ekspertiza o‘tkaziladigan sana va vaqt haqidagi xabarnomani kuting.
- Komissiya qaror qabul qilganidan so‘ng belgilangan nogironlik muddati, tasdiqlovchi hujjatni olish tartibi va qayta baholash zaruratini aniqlashtiring.